不普通的人

電影《媽媽的神奇小子》，最發人深省的，不是憑鬥志克服殘障的老調，也不是運動員待遇坎坷的哀歌，而是母親這角色對兒女的深層影響。

媽媽的神奇小子。媽媽行先，神奇小子居次。阿媽，是個會撐你、陪你跑、幫你剪腳指甲的人。但更重要的，是飾演你的精神領袖與精神後盾。

On your mark，音譯「望阿媽」，唔識英文的師奶的神來之筆。簡單、直接、中point。「望阿媽」代表「get ready」，代表「勇往直前」，代表「永不放棄」。這些精神，講唔出，但get到，連結上跑道上兒子那雙摩打腿。

「人人都唔當你係普通人，我就要你做個『唔普通的人』！」全世界都唔信阿仔得，但你係佢阿媽就無得唔信。相信的基礎，是「接受」。

接受殘障是事實，接受阿仔永遠不會是個普通人，然後心態就可以轉化，換個角度去欣賞他：「我個仔行得比人慢，但跑得比人快。」

阿媽接納兒子，令兒子也毫無懸念接納自己。兒子從沒問過一句，點解我要係痙攣？反而相信：「我條命就係咁，就係要向前追，一路衝，喺後面追返上來。」一旦接受了自己，則可心無旁騖做自己最擅長的事，於是「小明真係可以快過駕火車。」

走筆之時，有人批評殘奧的「殘」字有歧視之嫌，同時有運動員自白「殘」是事實， 殘而不廢才是重點，同樣體現「接納自己，人就強大」的道理。而自我接納來自與生俱來的「被接納」。生命裡第一個無條件接納自己的人，不是誰，正是阿媽。

****
追踪及讚好最新FB寫作專頁：黃明樂 Wong Ming Lok