「Story」

那晚，在餐廳匆匆吃飽，跑到櫃台結帳之際，忽然頭頂好像有度力，扯了我去外太空⋯⋯

返回地球那刻，朦朧間聽到七咀八舌：「小姐，你無事嗎？聽到嗎？ ok嗎？小姐？小姐......」

按店員所講，排隊時，我突然後仰，昏倒在地，數秒間，完全無反應。

斷了片，又醒過來，意識未完全恢復，但也心知，好——好——彩！

好彩未埋單。假如結帳後步出馬路才暈底，就真係「幫自己埋單」。

好彩食肆就在家的附近，家人九秒九趕來送我入院。

更好彩的是，當時大腦撞向鐵柱，無受傷無流血甚至無痛，醫生都說是奇蹟。

兩日兩夜，甚麼都檢查過，昏倒原因不明。即係無事？我問醫生。醫生說，總之，無嘢跟進，好好休息，抖下。

我傻笑了一下。翻譯他的結論：無事就無事，有事也無得避。一定係，除非唔係。

這狀況，很有趣。是福是禍，任君演繹。Coaching 裡講，每個人對於發生在自己身上但又「無原因」的事，都有個「Story」。

換了以前，我的「Story」一定是： 有無搞錯？！乜事都無，又阻住晒我寫文教書見clients⋯⋯（下刪一萬字） ，個天想點？

今天，在Coaching中聽過無數無常故事後，真心ok，心想這劇情若注定要發生，已是最幸運的版本。

由元旦確診，到年中暈低，我的最新「Story」是：宇宙提醒我，無乜事，躺平抖抖，hea下唔駛死、唔駛內疚。

有嘢做，唔駛預我。有得玩，記得叫我。各方好友，大家保重。人生慢慢嘆，有排玩。