撲飛睇子華

 如果香港人用捧子華場的決心去爭取民主，香港早就有雙普選了！

執筆之日，子華神開賣，正午時分，黃牛黨早已鳴金收兵。剩下的，都是趁吃午飯來踫運氣的上班族。

貴人開騷招風雨。大家撐着傘，當中還有幾把是搶眼的黃傘，氹氹圈打蛇餅，一幢大廈四面牆，一面牆平均排隊一粒鐘。

無人打尖，無人鼓躁，有人吃喝但無人丟垃圾。間中聽到有人碌手機看臉書：「買飛集氣，好多留言：加油，唔好放棄！」

棄與不棄，是個問題。午膳時間轉眼過。「走唔走？」「依家走？都到這田地了。或者有其他人走呢！」忽然前進幾個身位，有人無奈離場。更多人堅持不走，鬥長命，勝利屬於留到最後的人。

排在後面的OL，急然變了老友記。趕返工，急召阿媽「頂更」是也。老友記跟排隊的「隊友」打牙骹：「你知唔知黃子華是我同鄉？三水丫嘛。」「咁又點？你識佢老竇？」「識黃子華本人都無用啦！」輕輕鬆鬆又過兩粒鐘。

下午4：55。工作人員大聲宣布門票售馨。我等着看騷動的好戲。反高潮卻是，大家呆了半秒，抱怨都沒一句，和平散去。

一個人最厲害的魅力是甚麼？就是既有能力賦予群眾盼望，也有能力在盼望落空時，消弭群眾的怨言。

「我咁大個女都係第一次親身來排隊咋！」身旁的後生女望門輕嘆。而我想起雨傘運動中，年輕人都說，我一生人第一次瞓街。