劉華與張飛

今期熱話是劉華與張飛。

不是劉備與張飛。劇場朋友圈中常有個笑話，每度演出，台前幕後總會各自為親朋戚友訂票留票。票務問：「張飛留俾邊位？」答曰：「張飛留俾（劉備）關雲長。」爛gag一個，但講一次笑一次。

如今，輪到劉華與張飛。香港人，好慘。普選，固然是妄想。買樓，亦唔駛旨意。想睇下電視啫，免費電視發牌引起軒然大波。如今，偶一為之看場演唱會，原來都無你份。

如果是如常排隊如常網購，遲來一步空手而回，香港人願賭服輸。奇就奇在，這邊廂買不到票，那邊廂忽然冒出這個那個商戶免費贈票。

世上沒有免費午餐，前設是大額消費。買鑽石，送劉華，得。買床褥，送劉華，亦得。再來二萬哩數換劉華，得左。

消費換贈品，有咩問題，超市不一樣儲印花換廚具？可別忘記，超市賣的是日用品。但鑽石和貴價床褥，總不成每星期入貨吧。

二萬哩數，$6一哩，即要簽賬十二萬才換一張$580票，超過原價200倍。其他商戶贈票，同樣動輒六個位起標。

即係點？團積居奇，就算不是變相黃牛，也絕對是綑綁銷售。這些手法，絕對合法，但不合情理，太狼死，卻不難想像是日後大部分演唱會的趨勢。

世界難撈，有錢唔賺，藝人駛唔駛食飯？至於觀眾嘛。由大是大非到聲色犬馬，再次證明，在香港，若你堅持做個正常人，哪兒都無碇企。