家朗的球衣

古有國皇的新衣，今有家朗的球衣。

勢估唔到，關於港隊奧運的第一單大新聞，跟賽事無關，跟球衣有關。

面對無的放矢的道德審判，伍家朗的神回應，猶如國王的新衣。細路仔唔講大話，只懂把事實一五一十攤在枱面。罵人者無所遁形，自動收聲，連page都delete埋。

真相的力量，原來咁厲害。以前多少人說，運動員無資源，都無人理。如今，錯有錯着，真相曝光，全城心痛。哎喲喲～原來堂堂港隊代表，連衫都無得着，陰功豬！

其實，做打手，一樣陰功。家朗說，鬧還鬧，搞清楚先鬧。問題是，奢侈不起。打手的責任，正正是趁未搞清楚，好盡快鬧。重點，是鬧過、鬧咗。

雖知道這年頭，識時務與否，不單看你做了甚麼，也關乎你還沒做甚麼。躺平也是罪，不如有鬧錯，無放過。要擦存在感，也要交功課。咁大壓力，擦槍走火又如何。

反正罵人者也少擔心，萬一家朗被嚇得失魂落魄，差點放入袋的獎牌，就咁跌咗，茲事體大，始作俑者該當何罪。事關家朗連對着林丹都不腳軟，自問老夫算哪根蔥？

倒是這樣一搞，本來今年氣氛驟減的奧運，再次變成熱話。本來對賽事不算熱衷的，也忽然齊心集氣，為家朗打氣。上下一心，多謝幫襯。運動員以後從此有衫着。罵人者錯有錯着，壞心做好事，無間道的極緻。世事，就是這麼諷刺。


****

追踪及讚好最新FB寫作專頁：黃明樂 Wong Ming Lok