中女只有自己，可以隨心所欲。但也正因只有自己，唔變唔駛死。有細路的阿媽，唔為自己諗都為個細路諗下，上山下海跳崖都要 make things happen。中女嘛，遲啲先、諗下先、瞓左覺先、有心情先⋯⋯拖延症的幕後黑手，說穿了就是——恐懼。
中女不受覊絆，亦無牽掛，格外不知所措。正如無題的文章最難寫，無標準答案的考試最嚇人。當結婚、生仔、事業再上位這些主旋律都不再適用於自己身上，中女像艘甩了錨的船，在公海浮下浮下，自信心缺缺，安全感欠奉。
郁唔到、無衝勁、無熱情、奄悶、攰，想take個break 又唔敢，想變又唔知點變，人生下半場流流長，點搞？好想要答案。問題是，連題目也沒有。但其實，點解要有答案？
半杯水的道理。中女看見自己的疲累、脆弱、惶恐，看不見自己的空間、彈性、歷煉與天地。中女介意自己在主流裡沒有了位置，但天曉得最不需要主流認同的，就是中女。平凡是福、衣食不愁的中女，何苦以社會的尺去量度自己？
熟悉玄學的朋友說，九運是中女的天下。搞不好是因為，當全世界禮崩樂壞大洗牌，就是那道無題的作文。隨心而發，揮筆疾書，自成佳作。奮力一拚，重新尋覓追逐夢想，倒也進可攻退可守。別人不認同你，或許只是他們都沒有你的餘裕。
****
追踪及讚好最新FB寫作專頁：黃明樂 Wong Ming Lok
沒有留言:
發佈留言