我仲有無得變

「我呢個年紀，仲有無得變？」人到中年的life coaching clients，大都有此一問。

點可能無？！

查實世界天天在變。卑微的人類，情願不情願都會跟着變。 「我仲有無得變」是偽命題，實情是「想唔變都唔得」。既然如此，咁，點變最威水？

中年人慨嘆無復當年勇，只會變差，再難變好。其實甚麼是差？甚麼是好？

人生的起步點，通常是由自己的專長或學識開始的。是以年輕時所謂進步，不過是順勢而為，再加幾錢肉緊，勤力點、堅持點、搏盡點，然後順利上位，平步青雲。溫室小花，徒然自我感覺良好。

中年之變，卻往往直接挑戰自己的死穴。例如一個專業技術已爐火純青的人，忽然升呢要做管理層，卻不善領導或社交，點搞？

唯一方法，就是突破心理安全區，跨越那看似攀不過的山頭，方有另一片天地。過程，難到嘔，非因不習慣，而是——我們總是用從前的尺，去否定今天的自己。

「點解後生時乜都做到，依家乜都唔順？」中年人忟憎浮躁，壓根兒忘了，現正經歷前所未見的高難度動作。BB班與博士生，怎比？

年輕是踩油上坡的變。中年卻是轉跑道的變。從前借天賦上位，刻下靠突破蛻變。後者，難十倍，也厲害十倍，不是嗎？

大部分人，以為自己「無得變」，始於心急求成，自我質疑，繼而自我局限，終於自我放棄：算吧啦，早知唔試！都話唔得架啦。

做人，無論幾多歲，肯踏出一步去變，已經很了不起。比耐性、比心機、比掌聲自己，一直走到尾！

****
追踪及讚好最新FB寫作專頁：黃明樂 Wong Ming Lok