先例的迷思

Client跟我分享夢想。

對你來說，要達成夢想，最需要甚麼？我問。猜猜多數人怎麼答？

資金？人脈？運氣？百樂？伙伴？土地？

都——不——是。命中率最高的答案是——例子！

Clients多為70或80後，人生下半場，滿腦夢想，但大多得個諗字。唔想行，唔知點行，無人行過唔敢行。

多辛苦也不怕，就是不要trial and error——是人到中年的共同情緒。未行第一步，已經要看到最後一步。任何事，若無先例，唔慌好嘢，多數瀨嘢，三思，最後不行。

Clients自命性格使然：可能因為我份人好小心／好穩陣／好怕錯／好無安全感⋯⋯

然而天曉得所謂性格，實乃時代的產物。50、60後，少談先例。想當年拍手無塵、白手興家，乜都試，老子就是先例。90、00後，生於亂世，明白變幻才是永恆，世事，今日係，聽日就唔係，誰信先例？

只有70、80後，一出世，已註定是生產線上的罐頭。青雲路，跟着走，讀好書，打好工，賺到錢。經濟增長，配合超穩定社會結構，成王敗寇，孕育不要問只要信、肯做肯捱守規矩，卻也最默守成規的一代 。

如今，一下子要脫離範本，從頭來過，想起都腳軟。自覺生活奄悶想突破，但無先例又不敢做第一個 。中年人，in a way，是最rigid的一群。

係，好老土嗰句，中年人對先例的迷思，是——社會既錯。但既然一個人的價值與信念，來自社會。當社會變了，跟着變也無不可。我們比上更有體力，比下更有歷練與智慧，如果他們也不需先例，或許我們也沒有想像中這麼需要。

****
追踪及讚好最新FB寫作專頁：黃明樂 Wong Ming Lok