寧死不要做傻仔

久不久跟同學仔「傾戲」，即是，邊睇邊停，幻想主角就是自己，去到某關口，傾傾之後如何走。

《 Don’t Look Up》裡，天文學家發現行星襲地球，若不迅速處理，半年後人類將會滅亡⋯⋯好，停機。我問孩子，若是你，會怎辦？

「話俾總統知！」孩子們異口同聲。去片！兩位專家竟真的去了找總統，豈料總統完全不把他們當回事，點算？

「搵傳媒，上電視！」孩子們的反應跟劇情不謀而合。這次，電視台把危機當成花邊新聞，天文學家焦急得在鏡頭前怒吼，一夜之間，片段被網絡瘋傳，大出醜⋯⋯

孩子們，呆了。點收科？眾人頭上烏鴉飛過⋯⋯如果，如果再有機會，你還會再站出來公告真相嗎？

她搖搖頭：「第一次，我講你不聽，shame on you。第二次，明知自取其辱，我都再講，shame on me。」他點頭附和：「反正最後所有人都係死，何必伸個頭出來做傻仔？」

他換個角度想：「唔係喎，死鬼左，傻唔傻都無分別，講多次可能執返條命喎。」眾人反駁：「死唔去，仲慘，未必有人多謝你，但肯定會繼續笑你。」

沒想到，這個「寧死不要做傻仔」的討論，持續半晚。我問孩子，做傻仔，真的比死更難受？孩子們老氣橫秋說：「人總有一死，不是嗎？」

嗯，那你們覺得，故事裡的主角不惜一切都要講真相，又是甚麼心態？

孩子們嘗試換位思考：「搏盡無悔？」「咁先夠專業？」「或者她覺得，人總有一死，但一定要對得住自己。」頃刻，烏鴉再度飛過，眾人再度跌進沈思中。

****
追踪及讚好最新FB寫作專頁：黃明樂 Wong Ming Lok