聊天機械人

喜歡跟任何人聊天，除了——聊天機械人。

科技是條不歸路。聊天機械人，創意無限，談情尤其一流。

問機械人：欸，我有兩份工（或兩家餐廳或任何選擇），唔知點揀，你話，點好呢？機械人秒回：無論你點揀，我都咁愛你！

如此無條件的愛，哪裡搵？

但，除此以外，任何正經事，都足以激死你。

航班取消如何處理？銀行服務如何安排？報課程或考試點搞⋯⋯由初創企業到知名品牌，總有個名字不是Daisy就是Stacey的chatbot招呼你，無論問甚麼，都只節錄轉貼網站內文回應，你以為我無眼睇嗎？

既要問，當然就是例外情況。機械人比音頻電話更不堪，因為無法按0字跟客戶服務員聯絡。麥兜邏輯之常餐快餐特餐氹氹轉看似幫緊你，實則想你收聲知難而退。

然後，反過來，機械人流行到一個點，當我這個真人回覆客戶查詢，要不覺得自己在跟AI對話，就是被當成AI⋯⋯

問：「想要資料。」然後我傳上資料。「仲有無？」「你想要更多哪方面的資料？」

「都要。」「或者你先講講自己的情況？」「唔識講。」「是工作、人際關係、精神健康？或其他課題？」

「好難講。」「不要緊，你慢慢講。」「唔識講。」「要麽你上來面談，我跟你一起梳理？」「想要資料。」

溝通不良，每天上演，永恆的痛點。

不敢奢望今時今日仍有人像我一樣留戀真人交流，只求比人腦還要聰明的AI，有天甚至讀得懂腦電波，代替人腦聊天，方會暢通無阻。