海嘯中的不沈柴

這一波裁員潮，無遠弗屆，全無回落的跡象。隨便交換近況，都發現有朋友、朋友的朋友、朋友的朋友的朋友，中了招。

W在年初被集團派駐內地，負責管理新酒店。建築物都落成了，只差開張。豈料到埗才兩周，計劃臨時叫停，原隊遣返，回程時連帶去的行李都未拆箱！

D的公司，一直視國內為重點市場，一場海嘯，大刀闊斧就切掉了整個中華部門，大老闆到卒仔，無一倖免。

S的十二個老闆，本有四個秘書，早前裁剩她。待S重新建立好存檔制度，又裁了她，找個人工便宜一半的繼續運作。

上月搞聚會，一時錯口約了大伙兒在辦公時間踫面。心正着急，全人類竟然陸續到齊！「喂，我失業中，有冇好工？」是所有人的開場白。

以前，失業是家醜，萬萬不能外傳。今日，打工仔索性豁出去。面子，是其次，通報天下收料搵新工，才最實際。

於是，紅男綠女甫坐下，苦水滿天飛。「都唔夠人做野，仲炒！」「係囉，又話冇錢，仲登報請人。」「請人？請咩人？」「咪又係你做開嗰ｄ！」「唔係掛．．．」「你有興趣？」「梗有。不過你都做開，點解又炒你？」

對話，愈來愈像麥嘜裡的「快餐常餐特餐」。終於有人提議：既然如此，不如甲申請乙的工，乙申請丙的，丙申請甲的！

此話一出，竟然一呼百應。與其漁翁撒網寄幾百封信，不如收窄範圍唔熟唔食。面試好友做過的崗位，至少準備都充足點。

結果？不出一個月，大家成功重投勞動市場。不過，八折支薪！大眾一致結論：所謂裁員，還不過是乘機換血cut cost。手無搏擊之力的打工仔，能做條海嘯中的不沈柴，於願足矣。