長毛主席去旅行

真人騷，重點是，真。還有，人。人沒趣，愈真愈悶。人有趣，但不夠真，也不過癮。人之將走，未必其言也善，但人到無求，講句說話都避忌少點，真心一點。

長毛與主席，兩個加埋過百歲，行將收山，有話直說，無咩好怕。一起去旅行，好看在於，真性情流露。一個永遠隨意，另一個永遠恰當。

探望波蘭基層兒童，出發前，主席慎重抽空選禮物，認真程度媲美過年給長者買海味。長毛呢？在家中地毯式搜索，翻出塵封雜物，來歷不明，轉手送人，還滿有哲理的說：「送禮就是，把保存已久的，互相瑰贈，駛咩用錢買？」

集合，一個例早，一個例遲。一個無你符，一個話之你。「唔駛理佢啦──」是長毛口頭禪，主席在一旁咪着眼笑，潛台詞似乎是：「我就睇你點。」

幾天朝夕相對，長毛堅持那一句：「我同佢唔係好熟（x４）」。主席禮尚往來：「同你去旅行，都唔算好難受。不過無呢個節目，肯定不來。我做咩事要同你去旅行？好得閒麼？」長毛自顧自說得浪漫：「緣份嘛。緣份，就是一起浪費時間。」激死。

這些位，最好睇。與其叫作矛盾，不如說是火花。政治圈，不一定有真朋友，但也不會有世仇。打份工，我們都懂。觀眾如我，最黯然的，反而是酒吧那一幕。

兩個人，兩杯酒，各懷心事，思考香港可以點。長毛說，香港無運行。「因為太少人肯犧牲，包括我。抗爭，是要犧牲的。」半响，主席道：「我梗係唔同意啦。」那可以點？攝製隊問。「我點知？我知，就做左特首啦。」

托腮，半掩臉，落幕眼神。那一刻，主席欲言又止，比任何議會上的發言，都更讓我相信，這個才是真的曾鈺成。看罷真人騷，對香港的未來，愈發真心悲觀。