2021年5月17日星期一

早d抖的新日常


這陣子,香港人有個新日常。晚晚十點正,地鐵站人頭湧湧,演唱會散場咁款。轉車站候車月台之擠擁盛況,媲美集體收工。

十點鐘,集體歸家,對比往昔夜夜笙歌,人人忽然深閨,事關食肆齊齊打烊。限聚措施放寬後的那些ABCD區,聰明人才搞得懂。平凡人寧可play safe,若是商場舖,更是930一到,明天請早。9點last order,落遲些都無。

才剛入黑不久,已經周圍無嘢食,還有甚麼人生意義?不如返歸早d抖。入睡那刻,灰姑娘那午夜大鐘都未響,心理上已經覺得好夜。

發夢都無想過,疫情的副作用,是省電。記得有位支持環保的朋友,曾經舉腳贊成最高工時,原因是——省電。因為每天黃昏到夜晚的時段,商廈跟住宅同時用電,最浪費。如果人人工作時工作、返歸時返歸,天天數小時,起碼省一半電,條數好襟計。如今食肆提早打烊,人人早抖,也是異曲同工吧。

世事太荒謬,唯有換個角度看,凡事無所謂絕對好,更不會是絕對壞。就像即棄口罩和外賣膠兜,苦了地球,但少搭飛機也省回不少碳足跡。疫情帶來病痛,但也間接促成大家早睡早起、注意衛生。這陣子忽然覺得,相對吃喝玩樂都要去到盡的日子,有限度社交其實對身心都是剛剛好。

用一個廣角鏡,看清楚世事一環扣一環的沙盤推演,或許,無論多絕望的現況,終必落戶於某時某刻一個剛剛好的新平衡。

****
追踪及讚好最新FB寫作專頁:黃明樂 Wong Ming Lok

沒有留言: