我的Staycation Menu

朋友的臉書帖：「終於到我staycation，可惜不是五星級酒店，而是五星級醫院！」教我想起近日見營養師的經驗。

從來絕非超聽話的client，但也說不上曳，準確形容是⋯⋯麻煩兼固執。任何人給建議，都得經歷漫長討價還價的辯論過程，小女子才會心悅誠服。其時，那堅定心志，卻是天塴地冚也推不倒。

甫坐下，營養師未開口，我已一輪咀落閘：我工作好忙不能常煮飯；天天外出見客難免外膳好多餐；freelancer 日程混亂好難定時定量⋯⋯還有還有，我最怕被迫，但凡不是自願，就會連本來丁點改變的動力都會無晒⋯⋯

營養師看着覺得好笑，氣定神閒說：「你有去過 Staycation嗎？」我一呆。「Staycation menu：頭盤 （三選一），主菜（六選一），甜品（四選一）⋯⋯想食乜就食乜，係咪好開心呢？」

「這個分類表，給你。奶類，選一份；肉蛋豆類，選五份⋯⋯如此類推。選擇多過staycation menu，夠玩一個月。無人迫你跟餐單，你自己設計，好好發揮，我期待一個月後欣賞你的creativity，ok？」

我莞爾，好喜歡這比喻。心想，民主是我選了你做我的營養師，自由是你放手任我玩。自此，奶菜果肉穀 ，每日各自1，4，3，5，11份，無限配，自己食物自己揀。

朋友戲謔：「睇營養師，就係想要餐單，唔駛用腦。你呢D人，自己攞黎煩 ！」

Well，或者係。但有得揀，我至係老闆；無得揀，好慘。如果身體衰退的大方向，已經無得揀，如何回應，至少應該自己揀。係時候擱筆，埋首寫餐單。

****
追踪及讚好最新FB寫作專頁：黃明樂 Wong Ming Lok