陰・功

全世界無得剪頭髮，無陰功。

女士還好，順勢留長髮，打理得宜，一年半載不修不剪，也不礙眼，徒添嫵媚。

男士就慘，無論幾靚仔，不剪髮，都係一個生意失敗look，又或者，像個頹廢藝術家，死後才成名那種——不是我說的，是平均兩、三星期就上一次理髮店的男性朋友說的。作為女性，我倒覺得，「頭髮亂了」的男生，就像超短髮的女生，罕見得來，其實好charm。

跟男生一樣難搞的，是女生額前那撮瀏海（俗稱「嗰坺陰」）。日久失修，篤眼篤鼻，好想死。亂剪嘛，變出一個「飯碗頭」，日日zoom，點出鏡？

養兵千日，用在一朝。Steve Jobs話齋，回首來時路，方知道如何connect the dots。

話說N年前留學，窮學生捨不得常常剪髮。機緣巧合找到一家店，講明光顧一次，可無限次免費「修陰」。

嘩，咁着數！於是整整一年，我就真的只剪了一次髮，之後每月回去「修陰」。同時心想，食得唔好唗，不如順便學埋這門手藝。

點學？每次出門前，先試試自己剪一次（留少少長度讓髮型師有空間修正），然後拍個照。之後去找髮型師操刀，回來跟照片仔細對照，差別在哪，然後一次又一次摸索、觀察、嘗試、再摸索。留學畢業那天，我也練成了一套「陰・功」！

多年來，「陰・功」為我省回不少時間金錢，沒想過現在變了lock down下的生存技能。面對一團糟的危理處理，香港人真無陰功，唯有乜都學識自己做，窮途未必係末路。

****

追踪及讚好最新FB寫作專頁：黃明樂 Wong Ming Lok